دليل المدرس الجديد في كلية الطب

الفصل التاسع: كيف تمتحن الطلاب شفويا؟

يجب ان تفهم بوضوح أهداف الإمتحان الشفوي من وجهة نظر الممتحن، حتى تضع إستراتيجية ملائمة.
الأهداف الرئيسية هى:
أ- أن يبدوالممتحن أذكي من الطالب واكثر لؤما منه وخبثا منه، وأقوى منه في الشخصية.
ب- أن يبدو الممتحن أذكي و أوسع علما من باقي الممتحنين.
ج- أن يثبت الممتحن للطالب أنه حمار وإن معلوماته في الطب زي معلومات القرموطي في الإندماج النووي، حتى لا يفكر في الإعتراض فيما بعد.
د- أن الممتحن يخلص على الطالب بدري بدري علشان يلحق يروح على الغدا
ه- منع الطالب من منافسة الممتحن في البرايفت، خصوصا لو كان طالب الدكتوراه أو السكند بتاع الماجستير.

بعد فهمك الواضح للأهداف يمكنك استخدام هذه النصائح المجربة:
1- ضع الطالب في حجمه الحقيقي وافهمه كويس هو بيكلم مين.
2-كلمه بجفاء ورسمي جدا، خللي دمك خفيف و روش لما تهزر مع باقي الممتحنين عشان يعرف إنكم من طينة تانية.
3- كلم بقية الممتحنين وكأن الطالب غير موجود، خصوصا لما تتريق على إيجاباته.
4- حاول أن تسحق الطالب من أول سؤال ليتحقق الهدف وما تضيعش وقت في بقية الإمتحان.
5- إخبط أصعب سؤال عندك في الأول، الواد هيفرفر ومايخدش في إيدك غلوة بعد كده، حتى لو الأسئلة الثانية سهلة.
6- لوقفلت في وشك وما لقيتش غير سؤال سهل ، قوله بطريقة معقدة وملتوية عشان الطالب ما ياخدش باله إنه سهل ويضرب لخمة برضه.
7- إستدرجه لغلطة هايفة، صلحها له برذالة قبل ما يكتشفها، بهدله عليها، وإسأل السؤال اللي بعده بسرعة قبل ما يلحق يصلحها، وبعدين إمسكها له ذلة بقية الإمتحان.
8- لما يقع في نقرة وما يبقاش عارف يطلع، ما تحاولش تساعده، وإسأله سؤال تاني أو إطرده برة.
9- لو بدأ يتكلم بطريقة ممكن توصله للإجابة، قاطعه وقوله: ماتفكرش بصوت عالي أنا عايزالإجابة على طول.
10- إستعمل أحيانا بعض الأسئلة اللي ممكن يعرف إجاباتها من نوع:
- انت مش أخدت الحاجات دي في سنة أولى؟
- انت نجحت في ثانوية عامة ازاي؟
- هو الجيل بتاعكم كله كده؟
- إنت أهبل ياله؟
- متأكد إن أبوك مش تربي ومش حانوتي؟
- ولو يعني بعد عمر طويل نجحناك، هتقف قدام الحالة متنح كده برضه؟
- ولو نجحناك مش هيرجعوا يقولوا إنهيار مستوى الطب مسئوليتنا؟
11- أقعد إنت والممتحنين في دايرة حواليه، أو إقعدوا ورا ترابيزة طويلة علشان يفضل يلف شمال ويمين كل ما يتوجه له سؤال فتتلوح رقبته ويطلع من الإمتحان عنده سيرفيكال لوردوزيس.
12- حاول تقعد في الطرف إختار وقت مايكون باصص للمتحن البعيد وإدي له سؤال قصير وسريع، ماتعيدش السؤال مهما حصل.
13- من واجبك تختبر ذكاء الطالب مش بس معلوماته الطبية، إسأله أسئلة من نوع: هل العقم مرض وراثي؟
14- البس نضارة شمس، ما تديلوش فرصة يعرف رد فعلك على إجابته لو كانت صح.
15- لو طالب في البكالوريوس قوله بعد مايخلص: بالتوفيق يا ابني، أتمنى أشوفك بخير السنة الجاية!
16- لحماية نفسك من أي فعل يائس من الطالب شوفلك إتنين تمرجية شكلهم سوابق ودايما وقفهم وراك مربعين إيديهم ساعة الإمتحان.
17- إقرأ اسم الطالب في الكشف قبل ما يدخل جيدا، اسمه هو مش مهم، شوف الاسم الثاني والثالث انت تعرفهم ولا لأ.
18- إوع تتنرفز على طالب لو قالك يا أونكل بدل ما يقولك يا دكتور، راجع الاسم كويس ولو معرفتوش حاول تتأكد من اسم أمه وأخواله. بلاش تحرج نفسك مع الزملاء، خد بالك ان الحاجات دي مردودة وهنقعدلك في عيالك وعافيتك.

هذه النصائح الغالية وجدتها على احد اجهزة الكمبيوتر ولا اعرف من مصدرها نرجو من صاحب النصائح ان يخبرنا من هو وان يزيدنا منها.