نفسك تبقى حرامي قصيدة للشاعر د. وائل نبيل

http://farm1.static.flickr.com/26/46207366_3748feecb0.jpg?v=0[/img]


نفسك تبقى حرامي
تهبش ما تخليش
ويقولوا عليك سامي
ولا تطلع في الفيش
ولا تسرقلك خزنة
ولا تكسرلك شيش
خليك ويا كلامي
وانت في سعد تعيش

حط لنفسك بودرة
لمع بالورنيش
غير شكل السترة
بطل تلبس خيش
شغل عندك مهرة
علشان الترويش
هاتلك كار بالأجرة
دانت هتاكل عيش

واتكلم عن بكرة
والاحلام والنور
والمشروع والفكرة
والبلية أما تدور
يمكن رب القدرة
يبعتلك مغرور
مش قانع بالسترة
نفسه يعبي بحور

فهم كل الخلق
انك قال مش فاضي
واتكلم عن طنط
عن باباه القاضي
ودع حارة كشك
وابني لنفسك ماضي
ليكو في أسوان شركة
ليكو في سينا أراضي

كده الناس تحترمك
وتحبك وتهابك
تتكلم عن كرمك
عن نبلك وشبابك
يعلى ما بينهم هرمك
تتفتح أبوابك
تصبح جرة قلمك
ليها قيمة في جوابك

بعد ما تلهف منهم
كام مليون ملطوش
اوعى تفكر تهمد
دولا ما بيغطوش
لو تتكشف ليهم
يدوك بالبرطوش
أصل الصورة حقيقي
لسه ناقصها رتوش

أصل حرامي كبير
قبل ما مات وصانا
علشان تبقى الخطوة
فيها ثبات ورثانة
علشان تقدر ترمح
ولا اجدعها حصانا
لازم تعمل ضهر
لازم تبقى حصانة

والموضوع مش صعب
بس مكلف حبة
كل ما تدي الشعب
قرش هتلقى محبة
حبة هيصة وزمر
على بوليتيكا وهبة
يخلص دوغري الأمر
نلقاك تحت القبة

انزل بس الشارع
وامسك رق و عود
واخطب بلسان بارع
وادي الشعب وعود
ان الزمن اليانع
على يدك هيعود
وان مالكش مطامع
الا العدل يسود

واوعى تخاف م الوعد
أو من كترة كدبك
طول ما كلامك سعد
طول ما الشعب يحبك
وان جالك يوم حاقد
فكر انه يسبك
برضه هتفضل راقد
بأوامر من حزبك

كل اللي عليك يابني
تاخد بالأسباب
بحصانتك وبمالك
تتفتح الأبواب
واعمل على مصلحتك
وأنا هأرفعلك كاب
وإسرق فينا براحتك
أصلنا شعب (........) حذفت لأنها بديهية