شعرة بيضا- قصيدة للشاعرة هالة فتحي

زي عادتي
كل يوم الصبح تتكرر حكايتي
نفس روتين الحياه عايشاه سيادتي
و النهارده ... اكتشفت شئ جديد
لما عديت صدفه من قدام مرايتي

شعره بيضا .. باصصه من بين خصلتين
قصدها تلمحلي و افهم كلمتين
السنين فاتت عليكي .. و الشباب سابك و عدي
لسه عايشه في ذكرياتك .. من سنين زي النهارده
كل يوم تتصبري و تقولي هي شعره واحده

و لحد امتي توقفي عقرب ساعاتك
ما هو مستحيل حترجعي كل اللي فاتك
عارفاكي عمرك ما ابتسمتي
بالفرح ياما كتير حلمتي
عارفه ان ليلك كان بيقضي علي النهار
و انك فضلتي طول سنينك في انتظار
حبيب يكونلك في الشتا حضن و دفا
و بيت صغير يتملي حب و وفا
و تكوني ام
لكن الايدين متكتفه
و ادي السنين عدت بسرعه عاصفه
و لا حلم منهم انقضي
و عينيكي لسه مغمضه

لازم تفوقي و تكوني شاهده
ما بقيتش انا شعرايه واحده

طب بس قلبي لسه ببراءه جنين
ما شافش قصه حب و لا حس بحنين
صعب اصدمه .. و افهمه
ان الشقوق ملت الجبين
و ان اللي قده ساكن كفن و من سنين

لساني لما اسمع غنا بابقي سعيده
و لما اشوف عشاق بادوب مع التنهيده
تسحرني كلمه حب باقراها ف قصيده
بقي كل ده يا ناس يموت .... بشعره بيضا

لو بس كان العمر ينقاس بالسنين
اللي قضاها القلب و ما هواش حزين
كنتوا تلاقوني وسطكم ... بضفيرتين

عظمة ع العظمة يا أستاذة هالة. و مرحباً بكي في منتدانا. و شكراً لدكتور وائل إنه ضمك للمنتدى.

اولا مرحبا بالاستاذه هاله كعضوه فى منتدانا الصغير !! وثانيا احييك على هذة الكلمات المعبره الرقيقه ... الى الامام

شكرا لكل المشاهدين
و المعلقين

و شكر خاص .... د/ وائل

» ترحيب بالأستاذة الشاعرة هالة فتحي
» مفيش حاجة - قصيدة للشاعرة إيمان بكري
» إياك ونبش هذا القبر - قصيدة رائعة للشاعرة رشا جمال