إيه يهم= قصيدة من تأليف د. وائل نبيل

إيه يهم
تأليف د. وائل نبيل


ايه يهم إن كان هواكي

لسه سابح في الخلايا

ولا أنا عايش معاكي

رحلتي حتى النهاية

ولا كل دموعي جفت

وابتدت تنزف دمايا

مش مهم الروح لقلبي

مش مهم النور لعيني

مش ضروري تكوني جنبي

إمشي ياللا وودعيني

واهربي

أيوه اهربي

واستخبي عن عيوني

وانسي إنك فيا عايشة

مهما روحتى أو تكوني

بس وحياة اللي حبك

وأعنريني

إن كنت بأحلف

النهارده بحد تاني

لو تلفي الكون بقلبك

مش هتلقي حد يعرف

يمنحك

حبي وحناني

بكرة ياما تسمعي

ياما من حلو الكلام

اللي هيقوللك بحبك

واللي هيقول مش بأنام

وإن قدرتي لحظة تصفي

أو تفوقي ع الحقيقة

ولا مرت بيكي صورة

الحبيب أبو عين بريئة

أو فهمتي من الحكاية

يعني إيه معنى الغرام

مش هتلقي في النهاية

باقي مني إلا الحطام

مش هتلقي صدقيني

مش ضروري تكوني جنبي

إمشي ياللا وودعيني

مش مهم الروح لقلبي

مش مهم النور لعيني