ده شعب فقري

[b]

نظرا لأن النعمة فاقت حدها
ولأننا مش قدها
ولأن فعلا إنجازاتك
فوق طاقتنا نعدها
ولأننا غرقنا فى جمايل
مستحيل حنردها
نستحلفك .... نسترحمك
نستعطفك .... نستكرمك
ترحمنا من طلعة جنابك
حبتين
عايزين نجرب خلقة تانيه
ولو يومين
إسمع بقى
احنا زهقنا من النعيم
ونفسنا فى يومين شقى
عايزين نجرب الإضطهاد
ونعوم ونغرق فى الفساد
بينى وبينك حضرتك
دا شعب فقرى ما يستحقش
جنتك
انا عارفه شعب ما ينفعوش
إلا شارون وبلير وبوش
عايز يجرب الإمتهان
ويعيش عميل للأمريكان
بيمد غازه لإسرائيل
ويومين كمان ويمد نيل
أهو يعنى نشرب ميه واحدة
ندوب فى بعض
ماء وماء .... وماء وماء
ونفض سيرة الإنتماء
وبلاها نعرة وطنطنة
تبقى البلاد مستوطنة
متسلطنة .... بالسرطنة
ايه اللى خدناه من الكرامة والإباء
حبة خطب وكلام كلام
إحنا راهنّا على النظام
ورضينا بخيار السلام
بخيار
حنسد عين الشمس بيه
علشان مايطلعش النهار
يطلع لمين ؟؟؟؟
حبة معارضة مغرضين
وحسب بيان السلطة
شلة مأجورين
ياعم فضك سيرة
وإرضى بقسمتك
دا شعب مش فاهم أكيد
يللا اطرده من رحمتك
وإن كنت غاوى الحكم
خليك مطرحك
ها أغطس و أقب وأجيبلك
شعب يريحك
راضى وعمره ما يزعلك
أخرس وما بيسمعش
وأعميلك عنيه
مش كل قرش يبص فيه
ما يقولش لأه .. وفين ؟؟ .. وليه؟؟
يكبّر .. ينفّض فى السليم
وعلى الصراط المستقيم
وكل اللى يعرف ينطقه
عاش الزعيم
يحيا الزعيم